BAGUIO CITY - PATAY ang isang pulis habang isa ang sugatan matapos nilang makabakbakan ang mga kasapi ng Communist New People's Army sa Mt. Kapuwaw, Bagnen Proper, Bauko, Mountain Province kaninang umaga, March 29.
Sa panayam ng PTV Cordillera kay PMaj. Bernard Wong mula sa Investigation Section ng Mountain Province Police Office, sinabi nito na binawian ng buhay si Pat. Wilfredo Padawil na taga Tetep-an, Sagada, Mountain Province habang ginagamot sa Luis Hora Memorial Hospital.
Aniya, nagpapagaling naman ngayon ang nasugatang si PCpl. Irpeel Lapniten na taga Bayoyo, Buguias, Benguet.
Una nang inihayag ni PNP chief PGen. Oscar Albayalde sa kanyang pagdalaw sa Police Regional Office Cordillera kaninang umaga na naglunsad ng operasyon ang Regional Mobile Force Battalion sa nabanggit na lugar kasabay ng pagdiriwang ng NPA ng kanilang anibersaryo ngayong araw.
Sa ngayon ay nagpapatuloy pa ang clearing operations sa nasabing lugar.
Source: GEvascoD, PTV Cordillera
